[已審][九月素質帖] [進階講堂]意識流第一講──概念詞簡介

∼香Ｂ∼

意識流第一講──概念詞簡介

簡介

天龍無技術？的確，你苦練十年而成既「極限技術」，對方只需要花幾十分鐘打上一身７石就輕鬆虐待你。如果你真係咁諗既話，此post已完，見唔見右上角有粒紅色既交叉，輕輕禁落去吧＠＠，再見！

留返低既都應該係認同天龍有技術既玩家，今日就同大家講下意識流係天龍之中既理論同運用。

咁多年天龍經驗話我聽，而家係高手玩家入面流傳住兩種被公認「技術好」既打法。第一種係操作流，顧名思義，操作流高手對於自己門派既控技時間、鍵盤連控流暢度有極深既掌握。每次連控都絲毫唔比對手喘息空間，甚至連控到死。最經典、最常見既操作流高手就莫過於係天山同武當呢兩個門派入面出現。操作流我就講到呢到，另外我並唔想分析操作流同意識流既利弊，而事實上，呢兩種手法並無衝突，如果可以兩種手法都掌握晒，想唔勁都難啦。

入正題，簡介一下咩叫意識流先。意識流聽落好似好哲學，好難明咁，其實並唔係咁複雜，大致就係以下咁解：透過長時間及多元的訓練和實戰，令自己在戰鬥中有不同戰鬥片斷在腦海中閃過，且能窺視對手下一步動作並提前作出反應的戰術。意識流既定義係咪好簡單呢，再簡單ｄ講，就係估對方動作並提前作出反應。想擺脫枯燥既連控？想令每場戰鬥都熱血沸騰？來岩地方了，睇埋落下就知：）

Ps.1以下所講既所有情況都係雙方「公平」情況下既戰鬥，不存在技術、石量、抗性差距。

Ps.2原諒我只可以用返post過既片- -“ 因為而家再要上天龍影唔係咁方便。

概念詞

1.　輕功

第一個要介紹既意識流神技就係輕功。輕功係十大門派共通既技能，輕功既用法好簡單，只需要禁實Ctrl再點地，就可以用到，飛行距離為15米。我點解會話輕功係神技？首先輕功係一套「無法阻止」既動作（除天地明滅），當人物角色起腳輕功果刻，即使受到傷害，即使中左封技，即使死亡，都唔會停止當前角色既「飛行動作」，直到角色落地一刻。所以輕功就係十大門派避封技，避傷害最常用既技能，以下有唔同輕功避封技既例子。      

張圖有ｄ細，我講解一下。主視角武當，原本被逍遙控制住，然後七星準備反控，然逍遙時間一到就馬上輕功，七星打中輕功中既逍遙。

輕功避封技係最簡單亦係最常用既反控技巧，輕功冷卻短，可以係戰鬥中多次運用，同時輕功持續時間長（普遍大約2-3秒），對於七星聚首，一日喪命散，棒打狗頭呢種瞬發但控技時間短既控技可以產生有唔錯既破解效果。

　　   其二，輕功可以拉開距離。無論遠攻或近攻，面對住各門派既控技同爆發技，都應該避其鋒芒。能盡量減低對方連控中所受既傷害，就可以令自己勝率增加。所以輕功飛遠，離開對手視線後，對手要搵返你再重新鎖定都需要時間，咁就往往可以耗掉大部份既封技時間。另外距離拉開左，就可以更容易用初隱避接下來既封技（下面再詳講）。

輕功既特性除左上文所講既「不可阻撓」以外，輕功仲會受到角色移動速度所影響，譬如近戰角色係加速狀態下使用輕功，輕功會變得快左，同理減速都係。其次，輕功中既移動速度係會比普通移動快「少少」，證據就係當中左丐幫冰至無狗（減速100%）後使用輕功，人物仍會有一定既「移動速度」，哪怕係好慢好慢，而唔用輕功，係地上係無法移動的。所以就證明左輕功係會比普通移動快dd。

2.　初隱

初級隱遁（初隱）係天山既新手技能，基本上亦係十大門派必學既新手技，

初隱持續時間5秒，冷卻30秒；受到傷害或主動攻擊就會現形；對手若比自己高級10級，初隱會無效。其實初隱既冷卻話長唔長，話短亦唔短。但唔代表初隱可以亂用，初隱既價值係邊，同埋點樣用得有價值，呢個將會係我地以下探討既重點問題！

個人認為初隱有兩個最重要既作用：一，破封技；二，緩和戰況。

先講破封技，初隱既特色就係可以令所有非持續性及非群技能變成「未擊中」。點為之持續性技能？最簡單既例子就係含笑，暗器投擲（３秒持續傷害）；點為之群技能？除左九大門派既群傷害技能，峨嵋昭君、月落，逍遙驚濤駭浪等等既群技能都能「擊中」初隱中既角色。然而大部份既控技都係單體非持續技，即使係例如攬雀、烽火、一日散等必中技，若果出果下咁岩撞正對方初隱，呢招技就會變左「未擊中」，換言之，可以百分百避過封技。

其二，緩和戰況。有時候面對逍遙放大，少林百無一葦等情況，利用初隱就可以緩和戰況，唔會令比賽既節奏感流向對手，同時亦有多幾秒時間思考之後既動作，重新奪回戰場上既主導權。會唔會覺得有ｄ虛無？我地睇過例子就明。

呢張圖係我第一段片到cut落來，當時我用蘭花控技呂亙，控技時間一到就馬上初隱，目的係想呃對方出暗器打穴／畫地，結果佢無咁做，反而用左凌波。所以呢個初隱原意係想避封技，但最後變左緩和戰況。因為逍遙既凌波用得十分出色，極大部份情況下都可以做到視角之外打我，我因為無辦法見到目標，所以搵返對手既時間會更長，令蘭花4秒控技既優勢減低。因此呢個初隱可以維持返自己既優勢，亦唔怕對手作出既反控。

呢個就係初隱避封技既最佳例子，驚濤駭浪同初隱機乎同一時間出，一個初隱就換左對方６秒既控制，十分划算！

另外，初隱係有集氣技能既門派身上都有唔錯既發揮空間。初隱中使用集氣技能，例如星宿既蛤蟆功，逍遙既八陣圖，天山既金蟬等。係對方睇來都係唔會顯示集氣動作，咁樣就可以迷惑對手，大多數情況下對手唔會有心理準備，亦唔會知道你將會出呢d集氣技，所以有d小技巧就可以變得更靈活，例如逍遙唔需要每次都畫地八陣，可以中距離凌波初隱八陣，吸近攻追上來，再引爆八陣。呢種利用對方既思維盲點，亦係意識流一個重要既組成部份。

小結：

其實有人會話，避封技呢樣野都係講運氣，只要咁岩得咁橋，每個人都可以巧合地避晒對手所有封技，做到所謂既「意識流大師」，同時亦有人會質疑我，你講到咁把炮，點解唔每場比賽去破晒對方封技？我想講既就係，我係無辦法做到每次都成功破到對方封技，我自己都仍然係到透過訓練同觀察去提高自己對意識流既掌握。作為一個中手玩家，好多時會開始係戰鬥入面加上自己既思想，會諗下「我點樣鋪排技能先會更流暢」，亦會諗下「對住某某門派既套路應該點樣打」，我相信大部份愛好打交既玩家都會有呢種諗法。而再進一級，高手所做既，就係逆向思維，捕捉佢地諗野既邏輯，知道佢地面對特定情況會用咩方法應對，而自己再針對人地既方法作出破解，就個就係我所講既思想，即係意識流係每場比賽之既重要性。

都打左差唔多兩個鐘，今次講住基本野先，唔同門派既慣性思維同拆解方法將會係下一期再講解。覺得有幫助既就支持一下我吧